السبت، 26 مايو، 2012

لاتصالح ( منقولة من مدونة اخرى )

              لا تصالح


بدا الكلام انا مقاطع الانتخابات الرئاسية من المرحلة الاولي وهنا مش وقت جدال في جدوي او اسباب مقاطعتي ...
احنا فالخازوق اللي وصلنا له وبقي مطلوب من كل اللي حواليا يختاروا مابين شفيق (اللي بيصعب عليا اشتمه لان ربنا مسلط عليه هبله) وبين مرسي (اللي لما تشتمه اشتم مرشده وخيرته وجماعته)


الحقيقة في بداية حالة الغضب من الموقف ومن المسرحية الهزليه كنت فعلا مش عارف افكر بس بعد شوية هدوء لقيت ان الموقف اوسخ كتير قوي من انه ينتهي بتصويت !!


1-ازاي اشيل نظام اروح مرجعه تاني ؟ ايه هاشيل طيار اروح جايب تلميذه ؟ ....انا ممكن اسقط جنسيتي المصرية من العار لو حصل فعلا !!!
ناهيك عن دم الناس اللي رقبته وتجاوزا عن اننا هنبقي اول دولة تجيب رئيس معاه شهاده معاملة اطفال !! وعلي علاقة وطيدة بالمشير !!


2-طيب اجيب مرسي ؟ اجيب الاخوان ؟
مالهم الاخوان يعني ؟ ايه يعني باعونا في 2 فبراير ؟ لا عادي
وايه يعني باعونا في محمد محمود ومجلس الوزراء وباب اللوق وجسم سلمي اللي كان مغرق خرطوش واعضائهم فالبرلمان بياكدوا ان مفيش خرطوش زي ما قال وزير الحكومة اللي هما ضدها ياسلام ؟!!


المفروض امشي وراء النخبة المثقفة السياسية الواعية الامورة اللي لبستنا في كل خوازيق السنة اللي فاتت ومازالت وده اللي وصلنا له ؟؟
انتخب مرسي ؟؟ انتخب جماعة عمرها ما حافظت علي وعد ؟؟
المطلوب اسامح مؤقتا باسم الثورة ؟ اسف مبسمحش لو شفيق ايده في موقعة الجمل فالاخوان بسلبيتهم وانتهازيتهم ايده في دم ناس كتير برضه


حقك تختار مرسي وحقك تختار شفيق انا مقدر الطرفين
بس لو هتقولي انا بنتخب شفيق لاسلاموفوبيا بحته تبقي حمار لان في الف سبب ضده
ولو قولتي هامن لمرسي ضد الفلول ...هاقولك يامن للحريم يامامن للاخواني وسط البرسيم


انا قاطعت المرحلة الاولي ومقاطعة الاعادة ومش هتناقش في جدوي المقاطعة ....ممكن هتكون مش هتفرق فالشارع بشئ ...بس اكسب ضميري ومخسرش نفسي
اهم كتير ما انتخب حد من الوسخين دول وفالحالتين هندم فعلا علي اختياري ...


لو انا لوحدي في قراري مش فارقة ...هو من سنتين كان حد متوقع اي حاجة من دي تحصل او ان بعد ماكنوا مش بيكلموا 1000 فالمظاهرة تبقي 100 الف ومليون :)
عمر ماكان اقليتك معناها انك غلط ...ممكن يكون العكس تماما وتكون صح جدا ويكفيك ان ضميرك مرتاح


لله الامر من قبل ومن بعد ....